Einn áhrifamesti þáttur alþjóðaþjónustu Rótarýhreyfingarinnar eru nemendaskipti sem standa til boða börnum rótarýfélaga jafnt sem öðrum.
Ávinningur nemendaskipta er ótvíræður því nemandinn:
- lærir tungumál,
- hann kynnist menningu framandi þjóða,
- öðlast reynslu daglegs lífs í framandi landi,
- stofnar til vináttu við fjölskyldur og skólafélaga,
- kynnist hugsjón Rótarý í verki,
- er þátttakandi í starfi rótarýklúbbs
- og er rótarýfélagi framtíðarinnar.
Góður skiptinemi er góð landkynning og framlag til friðar í heiminum.
Rótarýklúbbur Hafnarfjarðar hefur tekið virkan þátt í starfinu með því að taka á móti skiptinemum og styðja íslensk ungmenni til skiptnemadvalar erlendis og hefur gert það frá 1982. Einnig hafa íslensk ungmenni á vegum klúbbsins sótt sumarbúðir Rótarý heim.
Fyrsti skiptineminn sem fór á vegum klúbbsins var Guðmundur Karl Jónsson
sem var skiptinemi í Bandaríkjunum 1982-1983. Klúbburinn hefur tekið á móti
alls 26 skiptinemum víðsvegar að úr heiminum. Á móti hafa verið sendir 34
íslenskir skiptinemar á vegum klúbbsins. Nemendur dvelja eitt skólaár í
dvalarlandinu hjá fjölskyldum rótarýfélaga eða öðrum. Skiptinemar þurfa að hafa
náð sextán ára aldri og ekki vera eldri en átján og hálfs árs þann 1. september
árið sem dvölin hefst.
Á engan er hallað þótt nafn Jóns Ásgeirs Jónssonar sé nefnt í sömu andrá og
fjallað er um þennan mikilvæga þátt í rótarýstarfinu. Jón Ásgeir starfaði í
æskulýðsnefnd umdæmisins af miklum eldhug og var í forystu þar um langt árabil. Hugsjónastarf
Jóns Ásgeirs hafði mikil áhrif í hans eigin klúbbi, Rótarýklúbbi Hafnarfjarðar
sem hefur staðið sig mjög vel í gegnum árin í starfi er lýtur að skiptinemum.
